مش عارف هى ثقافة مجتمع و لا ثقافة بنى آدم  ، من يومه وهوعايز يدارى ، خايف و مكسوف ومن عملته مدسوس ، أصلى آدم زمان لما غلط اتفاجئ من نفسه ، و برغم انه شاف عريه ونقصه ، لكنه ماقدرش يقبل حقيقته و يقبل انه إنسان عاصى و ضعيف وعشان كده راح يستخبى و احنا البنى آدميين فى سكة أبونا مكملين ، و كل يوم بنعمل زى آدم تمام،عايشين  مش قابلين نفسنا ، رافضين ضعفنا ، عايشين بنقول يا حيطة دارينى
وبسبب كده كتير مننا بيتعب قوووى و بيدخل فى دوامة البحث عن الكمال أو دوامة اليأس و الأكتئاب
يا ترى النهاردة أنا لغايه فين قابل نفسى و ضعفى ، لغاية فين شايف قصورى و متصالح معاه ؟ ولا لسه بأطلب عطف الأخرين و باستخبى ورا حيطة تدارينى و تستر ضعفى وعجزى ؟؟
بصراحة الدنيا حوالينا مليانة حيطان كتيرة الواحد ممكن  يستخبى وراها و من واحنا صغيرين شاطرين فى لعبة الأستغماية ، نعرف نستخبى فى مكان أمين ومحدش يعرف سكتنا فين ، علشان ندارى عمايلنا اللى مش تمام ، و فاكرين انها فى الستر مخبيين
أصلى انا فاكر انى لأزم  أبقى تمام التمام ، و عامل زى السوبر مان علشان كده عملت لنفسى حيطان تمام بدل ما الواحد يطلع قدام الناس أى كلام ،و كل ما أقرر أطلع من واحدة اكتشف انه لسه فى حياتى حيطة تانى وتانى وتاني
صلاة
يا رب ساعدنى
احتمى فيك و  اطلع من وراء حيطان كتيرة فى حياتى
نفسى أطلع للنور وأشوف الدنيا بجمالها وبنورها ،
نفسى أطلع من وراء ضعفى و خوفى
و أقولك يا رب مصيرى فيك و حمايتى معاك
أنا خلاص قررت أفتح طاقه فى وسط الحيطة و انط منها و أطلع للحياه ، و أسيب وراء الحيطة ضعفى وخوفى و  ارتباكى من الناس و الدنيا و المستقبل و الأمتحانات 0
أنا مصدق فيك يا رب انك الأمان ليه ، و أنك مش ممكن تكشف ضعفى وخوفى لكن فى حضنك تاخدنى
و تضمنى وتقولى فينك  من زمان ياللى ساكن ورا الحيطة ، فى حضنى الأمان والبهجة و هتشوف النور
و البحور و تتمتع بالصحة و السرور و أنت مستخبى فى حضن ملك الدهور .
أنا خلاص مش هسيبك تانى
هأفضل فى حضنك مستخبى
و تحت جناحك مستنى
و عن قلبك الدافئ مش هأرجع تانى أقول يا حيطة دارينى