مصنع الأحمال

زي ما بيقولوا الغالي تمنه فيه... وانه الماركة الغالية تمنها فيها... لأنها تقدر تواجه تغيرات الزمن. لأنها أصيله ومتأصلة... من تنفيذ ناس خبراء وعلماء حطوا فيها كل خبرات السنين.
علشان كده فعلا الغالي تمنه فيه.
وبنعرف نميز ونفرق بين المنتج ده وده... ونقدر نقول عليه: اشتريه وما ليكش دعوه اصل ده غالي وتمنه فيه
يعني مثلا... ممكن نشتري أسلاك محمله تقدر تستحمل الضغوط الكهربية العالية... لأنها متكلفه ومتخصصة انها تتحمل اي تيار زيادة  وتعيش معاك وتحطها وتنساها. لكن ممكن غيرها وشبهها بس تقليد ما يستحملش ويضرب ويعمل قفله ويولع الدنيا. لأنه مش مخصص للأحمال دي ولو شويه بس فوق ممكن يولع الدنيا.
طيب وإحنا مالنا ومال الأسلاك المنتجات والماركات هو المقالة دي بتتكلم عن افتتاح سوبر ماركت جديد ولا إيه؟
الحقيقة لا طبعا
إحنا بشر وعمرنا ما نتقارن بالماركات ولا إحنا منتجات... إحنا بشر
بس اللي عايز أقول عليه... إحنا أنواع زي المثل اللي فات.
يعني فيه ناس متخرجه من مصانع الأحمال... نقدر نقول عليهم خريجي مصانع الأحمال.
لأنه الصانع عارف إمكانياتنا وعجينتنا وجبلتنا... علشان كده دخلنا مصنع أحماله علشان للعالم يطلقنا .
لأننا مش بس هنشيل شيلتنا ده إحنا كمان هنحتمل أحمال غيرنا... وهو ده الفرق اللي علشانه صانعنا ما سابناش لوحدينا كده بقوتنا... لأننا ما نقدرش نحتمل إساءات حد لينا لوحدينا لاننا بشر
علشان كده
أدانا القوه والمعونة... نحتمل إساءات ناس هنقابلهم في حياتنا وهيجرحونا... وده مش ضعف مننا ولا علشان احنا فقدنا حسنا ولا علشان عجينتنا من طينه تانيه غير باقي أهلنا.
لا... لا علشان أخدنا معونة وقدرات من ايد الكبير أبونا... ولأنه كبير... علشان كده إحنا كبار وعلشان إحنا غالين لأنه دفع فينا تمن غالي أوي وثمين علشان كده احنا محملين.
ولأنه لما كان عايش هنا قبلينا استحمل إساءات ومهانات... لأنه كان شايف هدفه البعيد هناك
وإحنا هدفنا مجده ونرفع رايه اسمه... علشان كده ده مش هيحصل من غير ما نكون أحضان مفتوحه تتحمل وتحتمل ومنه هو بس المعونه.
علشان كده احنا خريجين مصنع الأحمال الإلهية... إحنا ولادة إحنا علي الأرض شهادته الحية
هنحتمل أضعاف غيرنا... والإساءات الموجهة لينا... من خلالها هنكشف للعالم مين هو اللي القوه مدينا
وكل طوب بيتحدف علينا هنجمعه من تحت رجلينا... وهنقف عليه وهنبي بيه... أسوار حب هنلف بيها علي كل اللي حوالينا.
ومهما كانت الإساءات اللي حوالينا ومهما كان الضغط علينا... يمكن جراح صعبه وكلام بيتقال علينا
علشان كده صعبه اوي لو واجهنا ده لوحدينا... المصنع الالهي فاتح بابه لكل اللي عايز الرب يساعده ويحمله هو وأحماله وكل الإساءات اللي متوجهاله.
تعالي نقدم في مصنع الاحمال الالهي وساعتها هنبص علي الإساءات اللي جايه علينا... إنها من ناس بجد هتصعب علينا.
 

مقالات - تأملات روحية